Jirinovskinin pasportu Sankt-Peterburqda hərraca çıxarılıb

Vladimir Jirinovskinin xarici pasportu hərraca çıxarılıb

LDPR-in (Liberal Demokratik Partiya Rusiyası)  mərhum lideri Vladimir Jirinovskinin xarici pasportu Sankt-Peterburqda yerləşən Şimal Auksion Evi tərəfindən hərraca çıxarılıb.

32gun.az Rusiya mediasına istinadən xəbər verir ki, bu barədə auksion evinin rəsmi saytında məlumat verilib.

Bildirilir ki, sənəd 1992–1997-ci illəri əhatə edir. Lotun təsvirində pasportun Jirinovskinin avtoqrafını, vizaları və Rusiya sərhəd xidmətinin möhürlərini ehtiva etdiyi qeyd olunub.

"Ölçüsü 12,5x9 sm-dir. Qolenkor üzlüklə, üzərində ştamplama var. Goznak istehsalıdır. Sənəd doldurulub. İstifadə izləri mövcuddur, ümumi vəziyyəti yaxşıdır", – deyə məlumatda bildirilir.

Hərrac 27 aprel tarixində keçiriləcək. Lotun ilkin qiyməti 100 min rubl təşkil edir.

Qeyd edək ki, Vladimir Jirinovski 2022-ci il aprelin 6-da uzun sürən ağır xəstəlikdən sonra 75 yaşında vəfat edib.

Bundan başqa, 2025-ci il sentyabrın 1-dən etibarən Rusiyada ali məktəb tələbə və magistrantlarına Vladimir Jirinovski adına təqaüd veriləcək. Müvafiq qərarı Rusiya Federasiyasının Baş naziri Mixail Mişustin imzalayıb.

Ayxan