Liftdə xəsarət alanların arasında Milli Məclisin işlər müdirinin qızı ilə nəvəsi də var (YENİLƏNİB)

Bakıda çoxmərtəbəli binanın liftinin qırılması nəticəsində yaralanan dörd yaşlı uşağın atası danışıb.

Sərxan Şərəfov Oxu.Az-a açıqlamasında bildirib ki, Nizami rayonu, Özbəkistan küçəsi 1 ünvanında “Yeni Ev 7” MTK-nın tikdiyi çoxmərtəbəli binadakı lift nasaz olduğu üçün şaxtaya düşüb:

“Yeni binada belə bir problemli liftin olması absurddur. Dünən liftdə olanların hamısı xəsarət alıb, bir nəfərin beli sınıb. Mənim dörd yaşlı qızımın sağ ayağında sınıq var. Dünəndən üç xəstəxana gəzmişik”.

O bildirib ki, həmin binada liftin qırılaraq şaxtaya düşməsi ilk belə hadisə deyil:

“Qonşulardan aldığım məlumata görə, eyni binanın başqa blokunda bir dəfə də belə hadisə olub. Burada məsələ səhlənkarlıqdır. MTK-nı idarə edən şəxslər məsuliyyətə cəlb olunmalıdırlar”.

16:35

Bakıda çoxmərtəbəli binanın liftinin qırılması nəticəsində xəsarət alanların arasında Milli Məclisin işlər müdiri Firudin Hacıyevin qızı ilə nəvəsi də olub. 

F.Hacıyev bəzi detalları Baku TV-yə danışıb: 

*** 12:50

Bakıda yaşayış binasında liftin qırılması nəticəsində xəsarət alanların vəziyyəti açıqlanıb.

Xəsarət alan 5 nəfərdən 4-ü bel, bud-çanaq və aşağı ətrafların travması diaqnozu ilə 3 saylı Kliniki Şəhər Xəstəxanasında hospitalizasiya olunub.

Qeyd edək ki, 1 nəfər tibb müəssisəsinə getməkdən imtina edib.

3 saylı Kliniki Şəhər Xəstəxanasında ilkin tibbi yardım göstərilən 1 nəfər ambulator müalicə üçün evə buraxılıb.

Qəza zamanı xəsarət alan 1 nəfər qapalı fəqərə sütunu travması L3-L4 fəqərələrinin cismində çökmə tipli sınıq diaqnozu ilə Respublika Neyrocərrahiyyə Xəstəxanasında zəruri tibbi yardımlar göstərildikdən sonra ambulator müalicə üçün evə buraxılıb.

Elmi-Tədqiqat Travmatologiya və Ortopediya İnstitutunda 2 nəfər ambulator müayinə edilib, 1 nəfər azyaşlıya sağ qamış sümüyünün yuxarı 1/3-nin sınığı diaqnozu ilə, digər bir nəfərə isə sol bayır kondilusun sınığı diaqnozu ilə gips langet qoyulub.

*** 10:24

Bakıda binada liftin qırılması nəticəsində 4 nəfər xəstəxanaya yerləşdirilib.

Bu barədə 32gun.az-a Tibbi Ərazi Bölmələrini İdarəetmə Birliyindən (TƏBİB) məlumat verilib.

Məlumatda bildirilir ki, hadisə nəticəsində xəsarət alanlardan 4-ü bel, bud-çanaq və aşağı ətrafların travması diaqnozu ilə 3 saylı Kliniki Şəhər Xəstəxanasında hospitalizasiya olunub. 1 nəfər tibb müəssisəsinə getməkdən imtina edib.

Xatırladaq ki, dünən saat 22:20 radlərində Nizami rayonu Özbəkistan küçəsi 1 ünvanında "Yeni Ev 7" MTK-nın tikdiyi çoxmərtəbəli binada lift qırılıb. Nəticədə liftdə olan 4 qadın və 2 azyaşlı xəsarət alıb.