Bu yazıda girişi 2021-ci ildə baş tutan bir dialoqla başlamaq qərarına gəldim...
2021-ci ildə Prezident İlham Əliyevlə Türkiyə Prezidenti Rəcəb Tayyib Ərdoğanın birgə Qarabağ səfəri zamanı gerçəkləşən dialoqu...
Ərdoğan tərəfindən səslənən sadə, bir o qədər də simvolik sualı yaddaşlara həkk olundu. Qardaş ölkənin lideri üzü Xankəndiyə doğru dayanaraq "Otel oradadırmı?" sualını verdi.
Cənab Prezident İlham Əliyev isə həmin an gülümsəyərək belə cavab verdi: “Orada da olacaq”.
Təbii ki, bu qısa dialoq təkcə iki lider arasında baş tutan zarafat deyildi. Bu, təməli qələbə ilə qoyulmuş bir yolun, iradə ilə qurulan bir gələcəyin siyasi anonsu oldu. Bu dialoq hərbi qələbədən sonrakı sülh və quruculuq mərhələsinin siyasi niyyətini və strateji baxışını ortaya qoyuşdu.
Artıq hər kəs əmin olmuşdu
Bu dialoqda səslənən fikirlər gələcəkdə reallaşacaq diplomatik və regional hadisələrin ipucunu vermişdi.
İndi 2025-ci ilin iyul ayındayıq. Azərbaycan Prezidenti İlham Əliyev və Prezident Ərdoğan bu dəfə Xankəndidə, inşa edilmiş yeni Konqres Mərkəzində keçirilən İqtisadi Əməkdaşlıq Təşkilatının 17-ci Zirvə görüşündə iştirak etdilər. Bu, sadəcə diplomatik toplantı deyil. Bu, beynəlxalq hüququn, siyasi iradənin və tarixi ədalətin birləşdiyi mərkəzdir.
Cənab prezidentin də qeyd etdiyi kimi, Azərbaycan diplomatiyasının çoxvektorlu siyasəti nəticəsində Xankəndi artıq beynəlxalq tədbirlərin ev sahibi statusunu qazanıb. Bu, yalnız Qarabağın yenidən qurulması deyil – bu, regionda güc balansının dəyişməsinin, yeni reallığın formalaşmasının təzahürüdür.
Prezident İlham Əliyevin zirvə toplantısında Qərbi Azərbaycan məsələsini qaldırması isə ölkənin daxili və xarici siyasətində davamlılıq prinsipinin təcəssümüdü. Bu çıxış ölkənin qüdrətini bir daha gözlər önünə sərdi.
Bu mövzu artıq İslam Əməkdaşlıq Təşkilatının qəbul etdiyi qətnamə və bəyannamələrlə beynəlxalq hüquqi müstəviyə keçib.
Ali Baş Komandanın çıxışı sadəcə “problemi xatırlatmaq” deyildi. Ermənistanla gələcək münasibətlərin qurulmasında bu məsələ artıq danılmaz faktora çevrilib.
Türk birliyinin siyasi simvolu
Zirvə görüşündə Ərdoğanın iştirakı isə təkcə qardaşlıq mesajı deyil, Türkiyə-Azərbaycan strateji ittifaqının konkret nəticələr verən siyasi platformasıdır. 2025-ci ilin Xankəndisində baş tutan bu tədbir “iki dövlət, bir millət” şuarının konkret siyasi təzahürüdür.
Bu gün Xankəndidə təkcə yollar, binalar və mərkəzlər deyil , Azərbaycanın gələcəyi qurulur. İqtisadi, siyasi və sosial baxımdan inteqrasiya olunan bu torpaqlar artıq yalnız müharibə simvolu deyil. Bu torpaqlar sülh, güc, diplomatiya və milli iradənin simvoludur..
Aygün İlqarqızı/ 32gun.az-ın baş redaktoru
