Avstriyanın Qras Universitetinin alimləri aşkar ediblər ki, sadə minnətdarlıq təcrübəsi insanın fiziki sağlamlığına əhəmiyyətli təsir göstərə bilər.
32gun.az xəbər verir ki, The Journal of Positive Psychology (JPP) jurnalında dərc olunan tədqiqat göstərir ki, minnətdarlıq məktubu yazmaq stress vəziyyətində ürəyin tənzimləmə qabiliyyətini yaxşılaşdırır və emosional yüklənməyə qarşı müqaviməti artırır.
Alimlər xüsusilə avtonom sinir sistemi və ürək reaksiyalarını tənzimləyən vagus siniri üzərində diqqət mərkəzləşdiriblər. Tədqiqatda əsas göstərici kimi ürək ritminin dəyişkənliyi götürülüb – bu, ürək-damar sisteminin çevikliyini əks etdirir.
İlk eksperimentdə 76 iştirakçı 15 dəqiqə ərzində minnətdarlıqlarını ifadə edən məktub yazıb, kontrol qrup isə neytral bir tapşırıq olaraq evdəki mebelləri təsvir edib. Sonra iştirakçılar stress testi keçiblər: kameralar qarşısında Robbie Williams-ın “Angels” mahnısını ifa etməli olublar. Nəticədə minnətdarlıq qrupu stress zamanı ürək ritminin sağlam U-formalı reaksiyasını göstərib – yəni stress zamanı ürək düzgün mobilizə olub və test bitdikdən dərhal sonra göstəricilər normaya qayıdıb. Kontrol qrupda belə dinamika müşahidə edilməyib.
İkinci eksperimentdə 133 iştirakçı iki həftə boyunca gündə üç minnətdar olduqları şeyi yazıb və ya xatırlayıb, kontrol qrupu isə günün ən vaxt aparan işlərini qeyd edib. İki həftə sonra kontrol qrupda ürək döyüntüsü artarkən, minnətdarlıq qrupu daha sakit ürək ritmi nümayiş etdirib.
Maraqlıdır ki, iştirakçılar subyektiv minnətdarlıq və xoşbəxtlik hissində artım qeyd etməyiblər. Bu, fizioloji təsirin şüurlu emosiyadan asılı olmadan meydana çıxa biləcəyini göstərir – yəqin ki, diqqətin minnətdarlığa yönəldilməsi beyin tənzimləmə mexanizmlərini işə salır.
Alimlər növbəti mərhələdə bu prosesdə hansı beyin sahələrinin iştirak etdiyini araşdırmağı planlaşdırır, xüsusilə prefrontal korteks üzərində fokuslanırlar. Bu sahə həm emosiyaları, həm də ürək fəaliyyətini tənzimləyir. Tədqiqatçılar hesab edirlər ki, neyron mexanizmlərin anlaşılması sadə minnətdarlığın insan sağlamlığına təsirini izah etməyə kömək edə bilər.
Ayaz
.jpg)
.jpg)
